កម្មករជិត៣០០នាក់ត្រូវព្យួរនិងបញ្ឈប់ពីការងារក្រោយកូដកម្ម

មេដឹកនាំសហជីពកម្មករបានឲ្យបានដឹងថា មានតំណាងសហជីព និងសកម្មជនកម្មករជិត ៣០០នាក់ នៅតាមបណ្ដារោងចក្រនានា ត្រូវបានថៅកែក្រុមហ៊ុនព្យួរ និងបញ្ឈប់ពីការងារ បន្ទាប់ពីធ្វើកូដកម្ម កាលពីថ្ងៃទី១៣ ដល់ថ្ងៃទី១៦ ខែកញ្ញា ឆ្នាំ២០១០។សេចក្ដីប្រកាសព័ត៌មានរួម របស់សម្ព័ន្ធសហព័ន្ធសហជីពការងារជាតិកម្ពុជា ហៅកាត់ថា ស៊ីអិនស៊ី (CNC) និងសហភាពការងារកម្ពុជា (CLC) ដឹកនាំដោយ អ្នកស្រី ម៉ម ញឹម និងលោក អាត់ ធន់ បានបង្ហាញថា ក្រោយពីបានបញ្ចប់ធ្វើកូដកម្ម ៤ថ្ងៃ ពីថ្ងៃទី១៣ ដល់ថ្ងៃទី១៦ ខែកញ្ញា ឆ្នាំ២០១០ កន្លងមកនេះ មានតំណាងសហជីព និងសកម្មជនកម្មករចំនួន ១៤៥នាក់ មកពី ១៦រោងចក្រ ត្រូវថៅកែរោងចក្របណ្ដេញមិនឲ្យចូលធ្វើការ។ ក្រៅពីនេះ ក៏មានក្រុមកម្មករចំនួន ១៤៥នាក់ផ្សេងទៀត ត្រូវបានព្យួរ និងបញ្ឈប់ពីការងារ ទៅតាមបញ្ជានិយោជក ជាថៅកែរោងចក្រកាត់ដេរទាំងនោះ។
លោក អាត់ ធន់ ប្រធានសហភាពការងារកម្ពុជា មានប្រសាសន៍ឲ្យវិទ្យុអាស៊ីសេរីដឹងនៅថ្ងៃទី២៦ ខែកញ្ញា ដោយលោកចាត់ទុកការប្ដឹង ឬព្យួរការងារតំណាងសហជីព និងកម្មករមិនឲ្យចូលធ្វើការ របស់ថៅកែរោងចក្រថា ជាការរំលោភច្បាប់។
លោក អាត់ ធន់ ប្រធានសហភាពការងារកម្ពុជា មានប្រសាសន៍ ៖ «ថ្មីៗនេះ គឺមានរោងចក្រ៣ គឺមានរោងចក្រអ៊ីហ្កាមិន រោងចក្ររិវវើរិច និងរោងចក្រវីននើរ បានបន្តព្យួរប៉ុន្មាននាក់ទៀត»។
ការព្យួរ និងបញ្ឈប់ការងារសហជីពជាតំណាងកម្មករដូច្នេះ ត្រូវបានមេដឹកនាំសហជីពកម្មករ លោក អាត់ ធន់ និងលោកស្រី ម៉ម ញឹម ចាត់ទុកថា ជាទង្វើរំលោភលើមាត្រា៣៣៣ នៃច្បាប់ស្ដីពីការងារកម្ពុជា ដែលបានចែងថា ត្រូវហាមឃាត់មិនឲ្យនិយោជកដាក់ទណ្ឌកម្មអ្វីមួយ ទៅលើនិយោជិក ដោយយកលេសនៃការចូលរួមធ្វើកូដកម្មរបស់សាមីជន។
ឆ្លើយតបមេដឹកនាំសហជីពខាងលើ លោក ជាតិ ខេមរា មន្ត្រីជាន់ខ្ពស់សមាគមកាត់ដេរកម្ពុជា មានប្រសាសន៍ថា ថៅកែរោងចក្រមិនបានបណ្ដេញតំណាង ឬសកម្មជនកម្មករចេញពីរោងចក្រមិនឲ្យធ្វើការនោះទេ ប៉ុន្តែគ្រាន់តែជាវិធានការណ៍ដើម្បីទប់ស្កាត់ការធ្វើកូដកម្ម អនាធិបតេយ្យ របស់តំណាងសហជីព និងសកម្មជនកម្មករ ដើម្បីឲ្យកម្មករចូលធ្វើការវិញតែប៉ុណ្ណោះ។
លោក ជាតិ ខេមរា មានប្រសាសន៍ឲ្យវិទ្យុអាស៊ីសេរីដឹងនៅថ្ងៃទី២៦ ខែកញ្ញា ពីវិធានការណ៍តាមផ្លូវច្បាប់របស់ថៅកែរោងចក្រ ចំពោះតំណាងសហជីព និងសកម្មជនកម្មករដឹកនាំធ្វើកូដកម្មដូច្នេះ ៖ «ដោះ ស្រាយតាមនីតិវិធីច្បាប់។ ទី១ គឺកុំឲ្យកូដកម្មបន្តទៀតរំខានគេ។ ហើយទី២ ទុកច្រកឲ្យកម្មករ ដែលគេចង់ធ្វើការ គេចេញចូលធ្វើការតាមធម្មតា។ ទី៣ ផ្អាកសកម្មភាពការជេរ តិះដៀលនិយោជក។ អាហ្នឹងហើយដែលគេសុំច្បាប់រក្សាការពារ»។
អ្នកតំណាងរាស្ត្រគណបក្សសមរង្ស៊ី លោក សុន ឆ័យ មានប្រសាសន៍ខ្លីថា ការបង្កើតសហជីពដើម្បីការពារសិទ្ធិកម្មករនៅក្នុងប្រទេសកម្ពុជា គឺមានការរើសអើងពីថៅកែក្រុមហ៊ុន និងរដ្ឋាភិបាល។ ការរើសអើងនេះ លោកស្នើឲ្យរដ្ឋាភិបាល ក៏ដូចជាថៅកែរោងចក្រ ត្រូវសហការគ្នាឲ្យបានល្អ ដើម្បីឲ្យការងារមានការរីកចំរើនទាំងអស់គ្នា។
លោក សុន ឆ័យ មានប្រសាសន៍ថា ៖ «កម្មករគាត់ចង់ចូលជាមួយសហជីព សុទ្ធតែទទួលការបង្ខិតបង្ខំមិនឲ្យចូល ឬក៏ចូលសហជីពណាដែលគាំទ្រដោយរដ្ឋាភិបាល។ នេះជាការបំបិទសិទ្ធិខុសច្បាប់ការងារទាំងស្រុង»។
មេដឹកនាំសហជីពការពារសិទ្ធិកម្មករ បានឲ្យដឹងថា បច្ចុប្បន្ននេះ និយោជក និងសមាគមរោងចក្រកាត់ដេរកម្ពុជា ឬហៅជាភាសាអង់គ្លេស GMAC នៅបន្តគំរាមកំហែងដល់ថ្នាក់ដឹកនាំ និងសកម្មជនសហជីព តាមរយៈការប្រើប្រាស់ប្រព័ន្ធតុលាការជាការបំបិទមាត់។
លោក អាត់ ធន់ បញ្ជាក់ថា នៅថ្ងៃទី២៧ ខែកញ្ញានេះ ដែលជាថ្ងៃជួបប្រជុំចរចាពីប្រាក់ខែកម្មករ មានការចូលរួមពីលោករដ្ឋមន្ត្រីក្រសួងសង្គមកិច្ច និងភាគីថៅកែរោងចក្រកាត់ដេរ ក៏នឹងស្នើឲ្យមន្ត្រីនៃសមាគមថៅកែរោងចក្រកាត់ដេរ ពន្យល់ឲ្យច្បាស់ពីការព្យួរការងារតំណាងសហជីព និងក្រុមកម្មករឲ្យបានច្បាស់ផងដែរ។
របាយការណ៍របស់សមាគមរោងចក្រកាត់ដេរកម្ពុជាបង្ហាញថា សព្វថ្ងៃ ប្រទេសកម្ពុជាមានរោងចក្រកាត់ដេរដែលបានចុះបញ្ជីផ្លូវការ ជិត៣០០រោងចក្រ មានកម្មករធ្វើការសរុបជាង ៣សែននាក់៕