អ្នកមកទស្សនាសាលាក្ដីមានជាង៦៥.០០០នាក់នៅឆ្នាំ២០១០

មន្ត្រីសាលាក្ដីខ្មែរក្រហមបានឲ្យដឹងនៅថ្ងៃទី១៦ ខែធ្នូថា នៅក្នុងរយៈពេល ១២ខែនៃឆ្នាំ២០១០នេះ មានប្រជាពលរដ្ឋរងគ្រោះនៅក្នុងរបបខ្មែរក្រហមចំនួនជាង ៦៥.០០០នាក់ បានមកទស្សនាដោយផ្ទាល់នៅសាលាក្ដីខ្មែរក្រហម និងទស្សនាឯកសារវីដេអូ ស្តីពីការកាត់ទោស ឌុច អតីតមេគុកទួកស្លែង របបខ្មែរក្រហមកន្លងមក។អ្នកមកទស្សនាជាង ៦៥.០០០នាក់នោះ បានមកពី ២៤ខេត្ត ក្រុង នៅទូទាំងប្រទេសកម្ពុជា រាប់ទាំងជនជាតិភាគតិចនានា នៅក្នុងខេត្តរតនគិរី និងមណ្ឌលគិរីជាដើម។ ការមកទស្សនានោះ បានធ្វើឡើងដោយស្ម័គ្រចិត្ត ដោយមានមន្ត្រីសាលាក្ដីខ្មែរក្រហមជាអ្នកសម្របសម្រួលអំពីមធ្យោបាយ ដឹកជញ្ជូន។
អ្នកនាំពាក្យសាលាក្ដីខ្មែរក្រហម លោក ឌឹម សុវណ្ណារុំ បានមានប្រសាសន៍ថា ចំនួនអ្នកទស្សនានេះ គឺជាចំនួនខ្ពស់លើសសាលាក្ដីព្រហ្មទណ្ឌអន្តរជាតិនានានៅក្នុងប្រទេស ដទៃទៀត ដូចជាប្រទេសរ្វ៉ាន់ដា (Rwanda) ជាដើម។
លោក ឌឹម សុវណ្ណារុំ មានប្រសាសន៍បន្ថែម ៖ «បំណងរបស់គាត់នេះ គឺគាត់ចង់មកឃើញការពិត។ គាត់ចង់មកឃើញថា ដំណើរការរបស់អង្គជំនុំជម្រះវិសាមញ្ញនៅក្នុងតុលាការកម្ពុជាហ្នឹង បានឈានដល់ដំណាក់កាលណាហើយ ហើយថា តើដំណើរការរបស់តុលាការហ្នឹង គឺវាត្រឹមត្រូវ ឬយុត្តិធម៌? គឺគាត់មកចូលរួមវិនិច្ឆ័យការកាត់ទោសមេដឹកនាំខ្មែរក្រហម»។
អគ្គលេខាធិការអង្គការសហប្រជាជាតិ លោក បាន គីមូន (Ban Ki-moon) ដែលបានមកធ្វើទស្សនកិច្ចនៅកម្ពុជា កាលពីចុងខែតុលា កន្លងទៅនេះ បានសម្ដែងការពេញចិត្តនឹងដំណើរការសាលាក្ដីខ្មែរក្រហមនេះ ជាពិសេសការផ្ដន្ទាទោស ឌុច សំណុំរឿង០០១ កន្លងមក។
សាលាក្ដីនេះបានប្រកាសសាលក្រមកាត់ទោសឲ្យ ឌុច ជាប់គុក ៣៥ឆ្នាំ កាលពីថ្ងៃទី២៦ ខែកក្កដា ក្រោមបទឧក្រិដ្ឋកម្មប្រឆាំងមនុស្សជាតិ និងបទរំលោភលើអនុសញ្ញាក្រុងហ្សឺណែវ ឆ្នាំ១៩៤៩ ស្ដីពីការប្រឆាំងការធ្វើទារុណកម្ម។
មន្ត្រីសាលាក្ដីខ្មែរក្រហមបានឲ្យដឹងថា សំណុំរឿង០០២ ដែលជាសំណុំរឿងសំខាន់ នឹងដំណើរការជម្រះក្តីនៅក្នុងរយៈពេល ៣ខែដំបូងនៃឆ្នាំ២០១១ ខាងមុខ។
សំណុំរឿង០០២នេះ មានជនជាប់ចោទដូចជា លោក អៀង សារី លោក នួន ជា លោក ខៀវ សំផន និងលោកស្រី អៀង ធីរិទ្ធ ដែលរងការចោទក្រោមបទឧក្រិដ្ឋកម្មប្រឆាំងមនុស្សជាតិ ឧក្រិដ្ឋកម្មប្រល័យពូជសាសន៍ ការរំលោភលើអនុសញ្ញា ក្រុងហ្សឺណែវ ឆ្នាំ១៩៤៩ និងការរំលោភលើក្រមព្រហ្មទណ្ឌកម្ពុជា ឆ្នាំ១៩៥៦ ស្តីពីការសម្លាប់រង្គាល ទារុណកម្ម និងធ្វើទុក្ខបុកម្នេញខាងសាសនា។
រដ្ឋមន្ត្រីក្រសួងការបរទេសសហរដ្ឋអាមេរិក លោកស្រី ហ៊ីលឡារី គ្លិនតុន (Hillary Clinton) ដែលបានមកធ្វើទស្សនកិច្ចនៅក្នុងប្រទេសកម្ពុជា កាលពីចុងខែតុលា និងដើមខែវិច្ឆិកា បានសន្យាថា លោកស្រីនឹងធានាថា សហគមន៍ប្រទេសផ្ដល់ជំនួយអន្តរជាតិ ផ្ដល់ថវិកាឲ្យបានគ្រប់គ្រាន់ ដើម្បីឲ្យដំណើរការកាត់ទោសមេដឹកនាំជាន់ខ្ពស់ខ្មែរក្រហមសំណុំរឿង ០០២នេះ ចប់ចុងចប់ដើម។
លោកនាយករដ្ឋមន្ត្រី ហ៊ុន សែន ធ្លាប់បានប្រាប់លោក បាន គីមូន និងលោកស្រី ហ៊ីលទ្បារី គ្លិនតុន ថា លោកមិនចង់ឲ្យមានករណី០០៣ទៀតទេ ដោយសារមូលហេតុអសន្តិសុខជាតិ និងអស្ថិរភាពនយោបាយនៅកម្ពុជា៕