ប៉ាក់គីអាវនៅតែគិតពីជម្រើសគូប្រកួតដែលត្រូវជួបលើកក្រោយ

ស្តេចប្រដាល់ហ្វ៊ីលីពីនម៉ានី ប៉ាក់គីអាវ នឹងធ្វើការសម្រចចិត្តលើជម្រើសគូប្រកួតដែលគេត្រូវជួបលើកក្រោយ ចំនួន៣នាក់ ។ កីឡាករទាំង៣នាក់នោះត្រូវគេជឿថា អាចជាការទាក់ទាញចំណាប់អារម្មណ៍(រកប្រាក់បានច្រើន)របស់បណ្តា អ្នកគាំទ្រវិស័យកីឡាប្រដាល់ ។ លោកម៉ៃឃើល ខុន ទីប្រឹក្សារបស់ប៉ាក់គីអាវបានប្រាប់អេភីកាលពីថ្ងៃសុក្រថា ការប្រកួតលើកក្រោយរបស់ប៉ាក់គីអាវដែលគ្រោងយកថ្ងៃទី៧ ខែឧសភាឆ្នាំ២០១១ត្រូវជួបអ្នកណាម្នាក់នោះនៅមិនទាន់បាន សម្រេចចិត្តនៅឡើយទេ ។ កីឡាករសេន ម៉ូស្ល៊ី Andre Berto និងចូអាន ម៉ានូអែល ម៉ាកហ្គេស គឺជាជម្រើសដែលប៉ាក់គីអាវត្រូវធ្វើការសម្រេចចិត្ត ។ ពួកគេទាំង៣នាក់សុទ្ធតែបានធ្វើសំណើផ្នែកហិរញ្ញវត្ថុសម្រាប់ការ ប្រកួតរួចជាស្រេចអស់ហើយ ។ លោកខុនបាននិយាយថា ស្ថានភាពក្នុងពេលឥឡូវនេះគឺថាកាលបរិច្ឆេទត្រូវបានគេអះអាង ធ្វើនៅថ្ងៃទី៧ ខែឧសភា ហើយទីកន្លែងប្រកួតទំនងជានៅឡាសវេហ្គាស ។ប្រធានរៀបចំការប្រកួតរបស់ក្រុមហ៊ុនTop Rank លោកបប់ អារ៉ាំបានធ្វើដំណើរទៅកាន់ប្រទេសហ្វ៊ីលីពីនដើម្បីចូលរួមពិធីខួប កំណើតលើកទី៣២របស់ប៉ាក់គីអាវកាលពីថ្ងៃសុក្រ ។ គេសង្ឃឹមថារូបលោកពិតជាលើកយកជម្រើសនេះពិភាក្សាជាមួយប៉ាក់ គីអាវក្នុងពេលនោះ ។ មានរបាយការណ៍មួយចំនួនដែលនិយាយថា ប៉ាក់គីអាវអាចនឹងធ្វើការប្រកាសឈ្មោះគូប្រកួតរបស់គេដោយខ្លួនឯង តែលោកខុនបាននិយាយថា នោះជារឿងមិនពិតឡើយ ។
សេន ម៉ូស្ល៊ី ត្រូវបានគេពិចារណាថា ជាដៃគូម្នាក់ដែលអាចជួបជាមួយប៉ាក់គីអាវ ដ្បិតកេរិ៍្តឈ្មោះរបស់គេល្អគួរសម ។ ឯកីឡាករម៉ាកហ្គេសវិញគេក៏មានកេរ្តិ៍ឈ្មោះល្អផងដែរនៅក្នុងចិត្ត អ្នកគាំទ្រ ខណៈដែលពីរបីសប្តាហ៍កន្លងទៅនេះប្រកួតជាមួយកីឡាករម៉ៃឃើល កាតស៊ីឌីសគេធ្វើបានល្អគួរសម ។ ម៉ាកហ្គេសធ្លាប់បានប្រកួតជាមួយប៉ាក់គីអាវពីរលើករួចមកហើយ ដែលលើកទី១នៅឆ្នាំ២០០៤(លទ្ធផលស្មើគ្នា) និងលើកទី២ ខែមីនាឆ្នាំ២០០៨ ចាញ់ប៉ាក់គីអាវដោយពិន្ទុយ៉ាងប្រផិតប្រផើយ ។
តាមអ្នកតាមដានមួយចំនួនថា ការប្រកួតទាំង២លើកនោះ ម៉ាកហ្គេសសមជាអ្នកឈ្នះទាំងអស់ ។ ប្រសិនបើការប្រកួតកើតឡើងនៅថ្ងៃទី៧ខែឧសភាមែន ម៉ាកហ្គេសអាចត្រូវគេផ្តល់ឲ្យនូវការលើកទឹកចិត្តបន្ថែមមួយ ។ ដោយឡែកកីឡាករBertoគឺជាសេះសំបុរខ្មៅដ៏ខ្លាំងមួយក្បាល ហើយប្រហែលជាដៃគូដ៏គ្រោះថ្នាក់បំផុតសម្រាប់ប៉ាក់គីអាវ ។ តែទោះជាយ៉ាងនេះរូបគេមិនសូវគេស្គាល់នៅក្នុងស្រទាប់អ្នកគាំ ទ្រធម្មតានោះទេ ។
សូមបញ្ជាក់ថា ប៉ាក់គីអាវដែលជាម្ចាស់ខ្សែក្រវាត់ពិភពលោក៨ប្រភេទទម្ងន់ខុសៗគ្នា ធ្លាប់ប្រកួតបានចំនួន៥៧លើក ឈ្នះ៥២លើក ចាញ់៣លើក ស្មើ២លើក និងធ្លាប់ផ្តួលដៃគូឲ្យសន្លប់ចំនួន៣៨លើក ។ ប្រកួតចុងក្រោយនៅអាមេរិក កាលពីថ្ងៃទី១៣ខែវិច្ឆិកា ឈ្នះកីឡាករម៉ិចស៊ិកអង់តូនីញ៉ូ ម៉ាហ្គារីតូដោយពិន្ទុជាឯកច្ឆន្ទ ៕