នាយក​រដ្ឋមន្ត្រី​ទទួល​ប្រាក់​សំណង​ជំងឺ​ចិត្ត​គ្រប់​ចំនួន​ពី​មូរ​សុខហួរ

សភាជាតិកម្ពុជាបានកាត់ប្រាក់ខែរបស់តំណាងរាស្ត្រគណបក្សប្រឆាំង លោកស្រី មូរ សុខហួរ គ្រប់ចំនួន ៨លានរៀលហើយ ដើម្បីសងជំងឺចិត្តលោកនាយករដ្ឋមន្ត្រី ហ៊ុន សែន ដែលលោកស្រី មូរ សុខហួរ បានចាញ់ក្ដីក្រោមបទបរិហារកេរ្តិ៍កន្លងមក។

សភាជាតិបានកាត់ប្រាក់ខែលើកដំបូងចំនួនជាង ៤លានរៀលកាលពីចុងខែកក្កដាកន្លងទៅនេះ និងបានកាត់លើកទី២ ចំនួនជាង ៣លានរៀលកាលពីដើមខែកញ្ញានេះ សរុប ៨លានរៀល ជាចំណែកនៃកញ្ចប់ថវិកាសងជំងឺចិត្តលោកនាយករដ្ឋមន្ត្រី ហ៊ុន សែន។

មេធាវីរបស់លោកនាយករដ្ឋមន្ត្រី ហ៊ុន សែន គឺលោក គី តិច បានមានប្រសាសន៍បញ្ជាក់ប្រាប់វិទ្យុអាស៊ីសេរីនៅថ្ងៃទី១៣ ខែកញ្ញា ថា លោកបានទទួលប្រាក់ជាង ៣លានរៀលលើកទី២នេះ កាលពីថ្ងៃទី៧ ខែកញ្ញាថ្មីៗនេះ ហើយបានប្រគល់ជូនលោកនាយករដ្ឋមន្ត្រី ហ៊ុន សែន កាលពីថ្ងៃទី៩ ខែកញ្ញា។

ការទទួលប្រាក់គម្រប់ ៨លានរៀលខាងលើនេះ ក្រោយពីគណៈកម្មការអចិន្ត្រៃយ៍របស់សភាជាតិ បានចេញលិខិតមួយទៀតចុះថ្ងៃទី១៩ ខែសីហាថ្មីៗនេះ បង្គាប់ឲ្យលោកស្រី មូរ សុខហួរ តំណាងរាស្ត្រគណបក្ស សម រង្ស៊ី បង់ប្រាក់ផាកពិន័យចំនួន ៨លាន ៥សែនរៀល ជូនរតនាគារជាតិកម្ពុជា ដែលជាប្រាក់ផាកពិន័យផ្នែកទី២ ។ ប៉ុន្តែលោកស្រី មូរ សុខហួរ មិនបានយល់ព្រមជាមួយនឹងការបង្គាប់នោះទេ៕

(សូមរង់ចាំស្ដាប់ព័ត៌មានពិស្ដារនៅក្នុងការផ្សាយរបស់វិទ្យុអាស៊ីសេរី)