តុលាការ​ខ្មែរ​ក្រហម​ចោទ​ប្រកាន់​មេ​ដឹកនាំ​ខ្មែរ​ក្រហម​៤​នាក់​ជា​ផ្លូវការ

តុលាការខ្មែរក្រហមនៅថ្ងៃ១៦ កញ្ញា បានប្រកាសដីកាដំណោះស្រាយ ដើម្បីបញ្ចប់ការស៊ើបអង្កេតសំណុំរឿង០០២ ដោយបានចោទជាផ្លូវការលើអតីតមេដឹកនាំកំពូលរបស់របបខ្មែរក្រហម ចំនួន ៤នាក់ក្នុងសំណុំរឿង០០២ ដែលកំពុងជាប់ឃុំឃាំងបណ្ដោះអាសន្ននៅតុលាការខ្មែរក្រហម។
តុលាការខ្មែរក្រហមគ្រោងនឹងធ្វើការជំនុំជម្រះអតីតមេដឹកនាំ ទាំង ៤នាក់នេះ នៅថ្ងៃដើមឆ្នាំ២០១១ ក្រោយពីការចោទប្រកាន់នេះ។
សហចៅក្រមស៊ើបអង្កេតកម្ពុជា លោក យូ ប៊ុនឡេង និងសហចៅក្រមអន្តរជាតិជនជាតិបារាំង លោក ម៉ាកសែល ឡឺម៉ុងដ៍ (Marcel Lemonde) នៅថ្ងៃព្រហស្បតិ៍ ទី១៦ កញ្ញា បានធ្វើការចោទប្រកាន់ជាផ្លូវការលើអតីតមេដឹកនាំទទួលខុសត្រូវ ខ្ពស់បំផុតចំនួន ៤នាក់ ក្នុងរបបកម្ពុជាប្រជាធិបតេយ្យ ឬខ្មែរក្រហម ដើម្បីអនុញ្ញាតឲ្យអង្គជំនុំជម្រះធ្វើការកាត់ទោសអ្នកទាំងនោះ។
សហចៅក្រមស៊ើបអង្កេតបានសម្រេចធ្វើការចោទប្រកាន់អតីតមេដឹកនាំ របបខ្មែរក្រហម គឺលោក នួន ជា អតីតនាយករដ្ឋមន្ត្រីស្ដីទីនៃកម្ពុជាប្រជាធិបតេយ្យ និងជាអនុលេខាបក្សនៃបក្សកុម្មុយនីស្ដកម្ពុជា ព្រមទាំងជាសមាជិកគណៈកម្មាធិការអចិន្ត្រៃយ៍ និងគណៈកម្មាធិការមជ្ឈិមបក្សកុម្មុយនីស្តកម្ពុជា, លោក ខៀវ សំផន អតីតគណៈប្រធានរដ្ឋ ឬប្រធានគណៈប្រធានរដ្ឋ និងជាអ្នកដឹកនាំមួយរូបក្នុងមន្ទីរនយោបាយមជ្ឈិម (មន្ទីរ៨៧០), លោក អៀង សារី អតីតឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងលោកស្រី អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ច ពីបទឧក្រិដ្ឋកម្មប្រឆាំងនឹងមនុស្សជាតិ, ការបំពារបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្ស៊ឺណែវឆ្នាំ ១៩៤៩, ឧក្រិដ្ឋកម្មប្រល័យពូជសាសន៍លើជនជាតិវៀតណាម និងចាម, មនុស្សឃាត, ការធ្វើទារុណកម្ម និងការធ្វើទុក្ខបុកម្នេញខាងផ្នែកសាសនា។
សហចៅក្រមស៊ើបអង្កេតកម្ពុជា លោក យូ ប៊ុនឡេង មានប្រសាសន៍នៅក្នុងសន្និសីទសារព័ត៌មាននៅឯតុលាការខ្មែរក្រហម ឲ្យដឹងថា សហចៅក្រមស៊ើបអង្កេតធ្វើការចោទប្រកាន់អ្នកទាំង ៤នាក់នេះ ក្រោយពេលមានការសាកសួរជនត្រូវបានចោទជាង ៤៦ដង ហើយការសាកសួរសាក្សី និងដើមបណ្ដឹងរដ្ឋប្បវេណីចំនួន ១ពាន់ដង។
លោក យូ ប៊ុនឡេង បន្ថែមទៀតថា អ្នកវិទ្យាសាស្ត្រឲ្យដឹងថា ជនរងគ្រោះប្រមាណពី ១លាន ៧សែននាក់ ទៅ ២លាន ២សែននាក់ ត្រូវបានសម្លាប់ក្នុងរបបខ្មែរក្រហម ហើយជនរងគ្រោះ ៨០ម៉ឺននាក់ក្នុងចំណោមជនរងគ្រោះទាំងអស់ ស្លាប់ដោយការប្រើប្រាស់អំពើហិង្សា។ ប៉ុន្តែសាលាក្ដីខ្មែរក្រហមបានលើកយកទីកន្លែងសម្លាប់ចំនួនតែ ៣៦ប៉ុណ្ណោះមកធ្វើការស៊ើបអង្កេត។
លោក យូ ប៊ុនឡេង បន្តទៀតថា តុលាការខ្មែរក្រហមនឹងត្រូវធ្វើការកាត់ទោសជនជាប់ចោទទាំង ៤នេះ ក្នុងរយៈពេល ៤ខែចាប់ពីការប្រកាសការចោទប្រកាន់ជាផ្លូវការរួចមក។ ប្រសិនមិនដូច្នោះទេតុលាការខ្មែរក្រហមត្រូវដោះលែងអ្នកទាំងនោះ ដោយគ្មានលក្ខខណ្ឌឲ្យមានសេរីភាព។
លោក យូ ប៊ុនឡេង បន្ថែមទៀតថា តុលាការខ្មែរក្រហមបានទទួលស្គាល់ដើមបណ្ដឹងរដ្ឋប្បវេណីចំនួន ២ពាន់នាក់រួចហើយសម្រាប់ការជំនុំជម្រះករណី០០២។ សហចៅក្រមស៊ើបអង្កេតរបស់តុលាការខ្មែរក្រហម បានលើកលែងការចោទប្រកាន់អតីតប្រធានមន្ទីរស-២១ កាំង ហ្កេកអ៊ាវ ហៅ ឌុច ឲ្យរួចខ្លួនពីករណីសំណុំរឿង០០២។
តុលាការខ្មែរក្រហមកាលពីថ្ងៃទី២៦ ខែកក្កដា បានកាត់ទោស ឌុច ឲ្យជាប់ពន្ធនាគាររយៈពេល ៣៥ឆ្នាំ ពីបទល្មើសឧក្រិដ្ឋកម្មប្រឆាំងនឹងមនុស្សជាតិ និងការបំពារបំពានលើអនុសញ្ញាទីក្រុងហ្សឺណែវ ១៩៤៩។ ប៉ុន្តែដោយសារ ឌុច ត្រូវបានឃុំឃាំងដោយខុសច្បាប់ក្នុងតុលាការយោធាកម្ពុជា ទើបតុលាការខ្មែរក្រហមបានសម្រេចកាត់កងទោស ឌុច ឲ្យជាប់ពន្ធនាគារត្រឹមតែ ១៩ឆ្នាំ។
លោក ម៉ាកសែល ឡឺម៉ុងដ៍ ក្នុងសន្និសីទសារព័ត៌មានក៏បានប្រកាសលាលែងដំណែងរបស់លោកពីសហ ចៅក្រមស៊ើបអង្កេត បន្ទាប់ពីតុលាការខ្មែរក្រហមបានបញ្ចប់ករណី០០១ និងបញ្ចប់ការស៊ើបអង្កេតករណី០០២។ លោក ម៉ាកសែល ឡឺម៉ុងដ៍ បន្ថែមថា លោកគ្រោងបម្រើការងារក្នុងសាលាក្ដីខ្មែរក្រហមតែ ៣ឆ្នាំទេ ប៉ុន្តែលោកបានធ្វើរហូតដល់ទៅ ៤ឆ្នាំ ដូច្នោះលោកបានសម្រេចលាលែងពីការងាររបស់លោក។
លោក ឌឹម សុវណ្ណារុំ មន្ត្រីទទួលបន្ទុកការងារព័ត៌មានផ្នែកកិច្ចការសាធារណៈនៃតុលាការ ខ្មែរក្រហម មានប្រសាសន៍នៅថ្ងៃព្រហស្បតិ៍ ទី១៦ កញ្ញា ឲ្យដឹងថា លោក ម៉ាកសែល ឡឺម៉ុងដ៍ នឹងចាកចេញពីសាលាក្ដីខ្មែរក្រហមនៅធ្នូ ឆ្នាំ២០១០។
លោក ម៉ាកសែល ឡឺម៉ុងដ៍ សម្រាប់រយៈពេល ៤ឆ្នាំ លោកត្រូវបានគេស្គាល់ ដោយសារលោកបានព្យាយាមធ្វើការចោទប្រកាន់ជនសង្ស័យដែលពាក់ព័ន្ធនឹង របបខ្មែរក្រហមបន្ថែមទៀត។ បំណងរបស់លោក ម៉ាកសែល ឡឺម៉ុងដ៍ ត្រូវបានជំទាស់ដោយលោក យូ ប៊ុនឡេង ដោយលើកហេតុផលថា ពេលវេលានៅមិនទាន់ដល់សម្រាប់ធ្វើការស៊ើបអង្កេតទៅលើជនសង្ស័យ បន្ថែម។ លោក យូ ប៊ុនឡេង បានឲ្យដឹងនៅថ្ងៃព្រហស្បតិ៍ ដែរថា លោកនឹងបន្តករណី ០០៣ និង ០០៤ ជាបន្តបន្ទាប់ក្រោយពេលករណី០០២។ លោក ម៉ាកសែល ឡឺម៉ុងដ៍ នឹងត្រូវជំនួសដោយចៅក្រមជនជាតិអាល្លឺម៉ង់ឈ្មោះ ស៊ើហ្វ្រេដ៍ ប្លាំង (Siegfried Blunk)៕