ភ្ញៀវទេសចរណ៍ទស្សនាប្រាសាទព្រះវិហារកើន៥០%

មន្ត្រីទេសចរណ៍ខេត្តព្រះវិហារបានអះអាងថា ក្នុងរយៈពេល៩ខែ ឆ្នាំ២០១០ នេះតួលេខអ្នកទេសចរណ៍ទៅទស្សនាប្រាសាទព្រះវិហារលើខ្នងភ្នំដងរែក មានចំនួនកើនឡើងជាង៥០% បើប្រៀបធៀបនឹង ៩ខែដូចគ្នាកាលពីឆ្នាំ២០០៩ កន្លងទៅ។ក្រុមអ្នកទទួលបន្ទុកការពារប្រាសាទព្រះវិហារ បានឲ្យដឹងថា ចំនួនភ្ញៀវទេសចរណ៍ទៅទស្សនាប្រាសាទព្រះវិហារកាន់តែច្រើនឡើងៗ ស្របពេលដែលរដូវរាំងស្ងួតបានមកដល់នៅក្នុងឆ្នាំនេះ។ មន្ត្រីប៉ូលិសបេតិកភណ្ឌមួយរូប ដែលសុំមិនបញ្ចេញឈ្មោះ កំពុងការពារ និងថែរក្សាប្រាសាទព្រះវិហារ បានមានប្រសាសន៍កាលពីរសៀលថ្ងៃអាទិត្យ ទី១៤ ខែវិច្ឆិកាថា ប៉ុន្មានថ្ងៃមកនេះ ចំនួនអ្នកទេសចរណ៍ឡើងទៅទស្សនាប្រាសាទព្រះវិហារ មានរាប់រយនាក់ក្នុងមួយថ្ងៃ ដែលចំនួននេះមិនធ្លាប់មានពីមុនមកទេ ៖ «ក្នុងខែនេះ កំណើនខាងទេសចរណ៍ជាតិយើងក៏មានច្រើនដែរ ហើយខាងអន្តរជាតិក៏វាកើនឡើងជាងមុន។ ម្សិលមិញហ្នឹងថ្ងៃប្រហែលជា១ថ្ងៃចូល ៣០០ទៅ៤០០នាក់ដែរ ខាងខ្មែរយើងហើយទេសចរណ៍បរទេសប្រហែលជាខ្ទង់ ២០ទៅ៣០នាក់»។
មន្ត្រីមន្ទីរទេសចរណ៍ខេត្តព្រះវិហារបានអះអាងថា ចំនួនភ្ញៀវទេសចរណ៍ទៅកាន់ខេត្ត និងប្រាសាទព្រះវិហារក្នុងរយៈពេល ៩ខែឆ្នាំនេះ គឺបានកើនឡើងជាង ៥០ភាគរយ បើប្រៀបធៀបទៅនឹងរយៈពេល៩ខែកាលពីឆ្នាំមុន។
លោក គង់ វិបុល ប្រធានមន្ទីរទេសចរណ៍ខេត្តព្រះវិហារ បានមានប្រសាសន៍ថា ក្នុងរយៈពេល ៩ខែ ឆ្នាំនេះ ខេត្តព្រះវិហារបានទទួលភ្ញៀវសរុបជាង ៨ម៉ឺន ៧ពាន់នាក់ ដែលក្នុងចំណោមនោះ មានភ្ញៀវអន្តរជាតិប្រមាណជាង ៧ពាន់ ៧០០នាក់ ដែលភ្ញៀវខ្លះបានទៅទស្សនាប្រាសាទព្រះវិហារ ៖ «គឺភ្ញៀវដែលមក ប្រាសាទព្រះវិហារហ្នឹង ៩ខែហ្នឹង គឺមាន ៥៣.៨៤២នាក់។ បើប្រៀបធៀបទៅ ៩ខែកន្លងទៅ គឺមានការកើនឡើងដូចខ្ញុំជម្រាបជូនអំបាញ់មិញ»។
ប្រាសាទព្រះវិហារ កាលពីមុនកើតមានជម្លោះព្រំដែនជាមួយថៃ គឺមានភ្ញៀវទេសចរណ៍ជាច្រើនបានចូលតាមប្រទេសថៃទៅទស្សនា ប៉ុន្តែចាប់តាំងពីមានបញ្ហាជម្លោះព្រំដែន ដោយមានការបិទច្រកព្រំដែន និងប៉ះទង្គិចគ្នាដោយអាវុធមក បណ្ដាលឲ្យបាត់បង់ភ្ញៀវទេសចរណ៍រយៈពេលជាង ២ឆ្នាំកន្លងមកនេះ។
មន្ត្រីមន្ទីរទេសចរណ៍ខេត្តព្រះវិហារបានឲ្យដឹងថា គេមានគម្រោងរៀបចំសន្តិសុខ និងសេវាដឹកជញ្ជូននានាឲ្យបានល្អឡើងវិញ ដើម្បីទាក់ទាញភ្ញៀវទេសចរណ៍ឲ្យទៅទស្សនាប្រាសាទព្រះវិហារនៅលើខ្នង ភ្នំដងរែកនោះឲ្យមានចំនួនកាន់តែកើនឡើងនាពេលខាងមុខ៕